செங்கமல நாச்சியார் கோவில்- கல்கி பொன்னியின் செல்வனின் கூறியது போல் ராஜராஜன் எழுப்பியதா ??

கல்கியின் பொன்னியின் செல்வன் தமிழில் வெளிவந்த ஒப்பற்ற வரலாற்று புதினம் என்று சொன்னால் அது மிகையல்ல. கிட்ட தட்ட 50 ஆண்டுகளுக்கு முன் வந்த அந்த நாவல் இன்றும் இளமையுடன் இளையதலை முறையை கவர்கிறது  என்றால் அதற்கு காரணம்  அருண்மொழி வர்மன் எனும் ராஜராஜ சோழன் மேல் மக்கள் வைத்துள்ள அபரிமிதமான அன்பும், கல்கியின் அருமையான கதை சொல்லும் திறனும் தான் அதற்கு காரணம்.

கல்கி பொன்னியின் செல்வனில் கூறியது என்ன ??

இந்த அற்ப்புதமான வரலாற்று புதினத்தை படைத்த கல்கி இந்த கோவில் பற்றி கூறும் செய்தி என்னவென்றால்,  அருண்மொழி வர்மனின் தந்தை சுந்தர சோழன் ஒரு தீவில் ஒரு வாய் பேச இயலாத,காது கேட்காத மந்தாகினி என்ற ஒரு பெண்ணை சந்தித்ததாகவும், அந்த பெண்ணை காதலித்து காந்தர்வ மனம் புரிந்தார் என்றும் பிறகு நாட்டில் ஏற்பட்ட குழப்பத்தின் காரணமாக அந்த பெண்ணை பிரிந்து ஆட்சி பொறுப்பு ஏற்றார் என்றும், பிரிந்ததால் ஏற்பட்ட குற்ற உணர்ச்சியில் அந்த பெண் தினமும் கனவில் வந்து பல நாட்கள் தூங்க இரவுகளாக துன்புற்றார்  என்றும் கதை நகரும். மேலும் அந்த பெண்ணை ஊமை ராணி என்றும், அருண்மொழி வர்மன் என்ற ராஜராஜ சோழனை பல முறை ஆபத்தில் இருந்தும் காத்தவள் என்றும் அதற்காக ராஜராஜ சோழன் அந்த ஊமைராணி என்ற மந்தகினிக்கு தஞ்சையில் ஒரு கோவில் எழுப்பியதாகவும் அந்த கோவிலின் பெயர் சிங்கள நாச்சியார் கோவில் என்றும் கல்கி பொன்னியின் செல்வனின் குறிப்பிட்டு  இருந்ததை படித்து இந்த கோவிலை நோக்கி பயணித்தேன். 

பொன்னியின் செல்வனில் வரும் ஊமைராணி என்கின்ற மந்தாகினி

சில செவிவழி செய்திகள் 

தஞ்சை குந்தவை நாச்சியார் மகளிர்  கல்லூரிக்கு  மிக  அருகில் உள்ளது இந்த சிங்கள நாச்சியார் கோவில்.  அந்த கோவிலை பற்றிய மேலும் தகவல் அறிய எனது தேடலை தெடங்கினேன்  அந்த தேடலின் விழைவாக முதலில் நான் அறிந்தது  மிகவும் சுவாரஸ்யமான செவிவழி செய்தி அது என்னவென்றால். தஞ்சையில் ஆட்சி புரிந்த ஒரு சோழ மன்னன் ஒருவன் ஈழத்து அரசன் ஒருவனை  பலமுறை அழைத்தும் அவன் வராமல் அவமரியாதை செய்ததாகவும். இறுதியில் அவன் தன குடும்பத்தோடும் சில காவல் வீரர்களோடும் வந்ததாகவும், பேரரசர் மிது உள்ள பயத்தில் மற்றவர்களை தஞ்சைக்கு  வெளியே இந்த காட்டில் இருக்கவைத்து விட்டு தான் மட்டும் மன்னனை சந்திக்க தஞ்சை நகருக்குள்  சென்றதாகவும், சென்றவன் நீண்ட  நேரம்  ஆகியும் வராததால் காவலாளிகள் துணுக்குற்றனர் , ஈழ அரசனின் மனைவியை அழைத்து கொண்டு தங்கள் நாட்டிற்கு செல்ல முயற்சித்தனர்  ஆனால் ஈழ அரசனின் மனைவி வர மறுத்துவிட்டதால்  அவர்கள் அவளை தனியே விட்டு சென்றதாகவும், அந்த ஈழ அரசனின் மனைவி அங்கயே இருந்து உயிர்விட்டதாகவும் அந்த தியாகத்தை மதிக்கும் வகையில் சோழ மன்னர்கள் இங்கே ஒரு நினைவாலயம் அமைத்ததாக தஞ்சையில் ஒரு செவி வழி செய்தி உள்ளது. இந்த செய்திக்கு ஆதாரமாக கல்வெட்டும், சரஸ்வதி மகால் நூலகத்தில் ஒரு நாட்டுப்புற பாடலும் உள்ளது என்றும் கூறுகிறார்கள்.

செங்கமல நாச்சியார் கோவிலின் மேப்

செங்கமால நாச்சியார் கோவில்
P.C http://muthusidharal.blogspot.com/

இன்னும் சிலரிடம் இதை பற்றி கேட்டறிந்த பொழுது ராஜராஜ சோழன் ஈழ தேசம் சென்ற பொழுது ஒரு முறை பெண் ஒருத்தி ராஜராஜ சோழனின் உயிரை காப்பாற்றியதாகவும் அந்த பெண்ணை கௌரவிக்கும் விதமாக ராஜராஜ சோழன் தஞ்சையில் இந்த கோவில் அமைத்ததாகவும் மற்றொரு செவிவழி செய்தி உண்டு. மேற்கூறிய இந்த செய்திக்கு வலு சேர்க்கும்விதமாக உள்ளது கல்கி பொன்னியின் செல்வனில் கூறியுள்ள செய்தி.

கோவிலின் உட்புறம்
P.C http://muthusidharal.blogspot.com/

இதை பற்றி ஆராய்ந்த இராசு சொல்லும் செய்தி 

மேலும் நான் தேடியதில் தஞ்சையை பற்றி ஆராய்ந்த கல்வெட்டு ஆராய்ச்சியாளர் இராசு அவர்கள் எழுதிய நெஞ்சை அல்லும் தஞ்சை நூலில் சில தகவல்கள் கிடைத்தது அது என்னவென்றால், 1815 இல் ஆங்கிலேயர் இலங்கையில் கண்டியை கைப்பற்றினர். கண்டி அரசர் விக்கிரரமராசசிங் அவர் தாயார் நான்கு மனைவியார் ஐம்பது உறவினர் சிப்பந்திகள் ஆகியோரை படகிலேற்றிச் சென்னைக்கு நாடுகடத்தி அனுப்பிவிட்டனர். பின்னர் வேலூரில் சில காலம் தங்கிய அவர்கள் தஞ்சை வந்தனர். தஞ்சை வந்தவர் எண்ணிக்கை 44 பேர் அரசரின் தம்பி கீர்த்திசிம்மராசுவும் அதில் அடங்குவார், அவர்களுக்கு தஞ்சை அரண்மனை அருகே சின்ன  மாரியம்மன் கோவில் சாலையில் தஞ்சையை ஆண்ட மராட்டிய மன்னர்கள் இடம் கொடுத்தனர் அவர்களுக்கு என்று ஒரு அரண்மனையும் கொடுத்தனர் அந்த அரண்மனை கண்டி ராஜ அரண்மனை இந்த அரண்மனை இப்பொழுது சிதைந்து உள்ளது. அவர்கள் தங்கி இருந்த இடத்திற்கு  கண்டிராஜபாளையம் என்று பெயரிட்டனர் , இந்த கண்டி ராஜபாளையம் என்ற பெயர் மருவி இன்று கொண்டிராஜபாளையம்  என்று அழைக்கபடுகிறது.

கண்டி ராஜபாளையம் என்று அழைக்கப்பட்ட தற்போதைய கொண்டிராஜபாளயத்தின் மேப்

கொண்டிராஜா பாளையத்தின் செயற்கைக்கோள் படம்

கண்டி அரசகுடும்பத்தினர் பலர் இறந்தபொழுது அவர்களுக்கு மராட்டிய அரச குடும்பத்தார் கோரி( சமாதி ) அமைத்தனர். இக்குடும்பத்தைச் சேர்ந்த ராசரத்தினத்தின் சிம்மள கழுகளா தேவி என்பவர் தஞ்சையில் 1839 இல் காலமானார் . கீர்த்தி சிம்மராசாவின் வேண்டுகோளுகிணங்க அவருக்கு ஒரு சமாதி கோயில் எழுப்பப்பட்டது.  அந்த கோவிலே பின்னாளில்  சிங்கள நாச்சியார் கோவில் என்று வழங்கப்பட்ட இன்றைய  செங்கமல நாச்சியார் கோவில். என்று  இந்த கோவிலை பற்றி ஆராய்ந்த கல்வெட்டு ஆராட்சியாளர் இராசு தனது நூலில் குறுப்பிடுகிறார்.

செங்கமல நாச்சியம்மன்
P.C http://muthusidharal.blogspot.com/

இந்த கோவில் சோழர் காலத்திய கோவில் என்பதற்கு  கல்வெட்டுகளோ வேறு பிற சான்றுகளோ இல்லை  மேலும்  மூன்றாம் ராஜராஜன் காலத்தில் மாறவர்மன் சுந்தரபாண்டியன் சோழர்களை வீழ்த்தி, தஞ்சை நகரை ஏரியூட்டி அழித்தான், கழுதை கொண்டு உழுது வரகு விதைதான் , இதில் தஞ்சை பெரிய கோவில் தவிர இங்கு ஏதும் மிச்சம் இல்லை என்பதே ஆராய்சியாளர்கள் கருத்து.  ஆகவே இது கண்டிப்பாக பழைய கோவில் அல்ல, இதில் உள்ள சிலைகள் உட்பட எதிலும் சோழர் கைவண்ணம் இல்லை. எனவே இந்த கோவில் சோழர் காலத்தில் கட்டப்பட்ட கோவில் அல்ல என்பதும் இது மராட்டியர் காலத்தில் எழுப்பப்பட்டது என்பது  தெளிவாகிறது.

குறிப்புக்கள்

இராசு எழுதிய நெஞ்சை அல்லும் தஞ்சை

நன்றி

கணேஷ் அன்பு