உடையாளூர் ராஜ ராஜ சோழன் சமாதி உண்மையா ??? – ஓர் அலசல் (பள்ளிப்படை பயணம் -4)

உடையாளூரில் இருப்பது ராஜ ராஜ சோழன் சமாதி தானா என்பதை உறுதி செய்து கொள்ளவும், உண்மையை ஆராயவும்,பால் குளத்தம்மன் கல்வெட்டை பார்க்கவும் வடிவேல் பழனியப்பன் ஐயா, நான், கோவிந்தராஜன் ஐயா, திருமதி கோவிந்தராஜன் அம்மா, அன்பு அரசு, சிவா, அன்பு,  ஸ்ரீனி ஆகிய 8 நபர்களும் மீண்டும் பள்ளிப்படை நோக்கி பயணம்  மேற்கொண்டோம் !!!

மீண்டும் ஒரு முறை பஞ்சவன் மாதேவி கோவில் சென்று அந்த மாதரசியை வணங்கிவிட்டு உடையாளூர் புறப்பட்டோம். அன்று நான், விஜயகரன், லோகேஷ் முதல் முறை செல்லும்பொழுது இருந்த அதே பதட்டமும், ஆவலும், பூரிப்பும், எப்பொழுது உடையாளூர் வரும் என்ற ஆர்வம் இன்று அவர்கள் முகத்தில் பொங்கி வருவதை ரசித்துக் கொண்டே அமர்ந்திருந்தேன். முதலில் பால்குளதம்மன் கோவில்  சென்று விட்டு வந்து ராஜராஜ சோழனை தரிசிக்கலாம் என்று முடிவெடுத்தோம் .

பால்குளத்தம்மன் கோவில்

உடையாளூர் ராஜ ராஜ சோழன் சமாதி இருக்கும் இடத்திலிருந்து சிறிது துரத்தில் உள்ளது இந்த பால்குளத்தம்மன் கோவில்.வழியில் விசாரித்துகொண்டே கோவிலை நோக்கிச் சென்றோம். அப்பப்பா !!! என்ன அழகான கிராமம் ? குறுகலாக இருந்தாலும் எவ்வளவு நேர்த்தியாக அமைக்கப்பட்ட தெருக்கள் ? இங்கெல்லாம் நம் மன்னன் வந்து இருப்பாரா?? அவரின் பாதம் இந்த இடத்திலெல்லாம் பட்டிருக்குமோ ?? போன்ற சிந்தனை அலைகள் என்னை ஆட்கொண்டன. இறுதியாக மனது ஒரு முடிவுக்கு வந்தது ,அது இந்த மண்ணில்தான் நமது மாமன்னன் அமைதியாக உறங்குகிறான்  அப்படி  என்றால்  கண்டிப்பாக இது புண்ணிய பூமிதான், என்று ஆழ் மனதில் தோன்றி அந்த தோன்றிய  அந்த எண்ண ஓட்டங்களினால் உந்தப்பட்டு  ராஜ ராஜ சோழன் வாழ்ந்த காலத்திற்கே பயணித்து விட்டேன்,  காரில் சென்று கொண்டு இருந்ததை மறந்தேன். என் மன்னனுடன் தேரில் பயணிப்பது போல் என் எண்ண ஓட்டம் சென்று கொண்டு இருந்தது. பால் குளதம்மன் கோயில் வந்ததும் என் நண்பன் அன்பு அழைத்ததால் கனவுலகில் இருந்து இருந்து வெளியே வர நேர்ந்தது.

கல்வெட்டு சாசனம் உள்ள தூண்

பால்குளத்தம்மன் கோவிலை பார்த்தபொழுது அது சமிபத்தில் கட்ட பட்டிருக்க வேண்டும் என்பது புரிந்தது. கோவிலின் வாயிலில் ராஜ ராஜ சோழன் சமாதி என்று சொல்லப்படும் இடத்தில இருந்த மண்டபம் இடிந்த பிறகு அங்கு  இருந்து கொண்டு வரப்பட்ட இரண்டு தூண்களும் இப்பொழுது பால்குளத்தம்மன் கோவிலின் வாயிலில் வைக்கப்பட்டு உள்ளது. பல்குளத்தம்மன் கோவிலில் உள்ள  தூணும் அதில் உள்ள கல்வெட்டும் முதலாம்   குலோத்துங்க சோழன்  காலத்திய கல்வெட்டு.

கல்வெட்டு சாசனம் உள்ள தூண்

அந்த கல்வெட்டில் உள்ள வாசகங்கள் இது தான் :

1 ஸ்வஸ்திஸ்ரீ ஸகலபுவந சக்கரவர்த்திகள் ஸ்ரீகு

2 லோத்துங்க சோழ தேவற்கு யாண்டு நாற்ப

3 த்திரண்டாவது ஸ்ரீசிவபாதசேகரமங்கலத்து

4 எழுந்தருளிநின்ற ஸ்ரீராஜராஜதேவரான ஸ்ரீ

5 சிவபாதசேகரதேவர் திருமாளிகை முன்பில்

6 பெரிய திருமண்டப முன்[பி¦]லடுப்பு ஜீர்

7 ந்நித்தமையில் இம்மண்டபம் எடுப்பி

8 த்தார் பிடவூர் (பிடவூர் வேளான்) வேளா

9 ன் அரிகேசவனாந கச்சிராஜற்காக இவ்வூர்

10 நாயகம் செய்து நின்ற ஜயசிங்ககுலகா

11 ல வளநாட்டு குளமங்கல நாட்டு சா

12 த்தமங்கலத்து சாத்தமங்கலமுடை

13 யான் நம்பிடாரன் நாடறிபுகழன் இ

14 வருடன் விரதங்கொண்டு செய்தார் இ

15 வ்வூர் பிடாரகளில் ராஜேந்த்ரசோழனு

16 தைய நாயகநான ஈசானசிவரும் தேவ

17 நபயமாந அறங்காட்டி பிச்சரும்

கல்வெட்டின் பிரதி

இக் கல்வெட்டில் முதலாம் குலோத்துங்க சோழனின் நாற்பத்தி இரண்டாவது அட்சியாண்டான கி பி 1112 இல், சிவபாத சேகர மங்கலத்தில் எழுந்தருளி நின்ற ஸ்ரீ ஸ்ரீ ராஜ ராஜ தேவரான ஸ்ரீ சிவபாதசேகர தேவர் திருமாளிகை ஒன்று இருந்ததாக குறிப்பிடப்பட்டு உள்ளது. இம் மாளிகையின் பெரிய மண்டபத்தின் முன் பகுதி சிதைந்தால், பிடவூர் வேளாண் வேளிர் அரிகேசவனான கச்சிராஜர் என்பவர் புணரமைத்ததாக கல்வெட்டின் முலம் அறியமுடிகிறது. அவருக்காக அவ்வூர் நாயகம் செய்து நின்ற சாத்தமங்கலமுடையான  நம்பிடரான் நடாறிபுகழன் விரதங்கொண்டு செய்தார் என்ற குறிப்பும்,  ஈசான சிவர் அறங்காட்டிப் பிச்சர் என்பார் துணை நின்றமையும் கூறப்பெற்று உள்ளன.

இக் கல்வெட்டை ஆராய்ந்த குடவாயில் பாலசுப்ரமணியன் அவர்கள் தனது குடவாயில் சிறப்பு கட்டுரைகள் நூலில், இதில் உள்ள “எழுந்தருளி நின்ற ஸ்ரீ ராஜராஜ தேவரான ஸ்ரீ சிவபாத சேகர தேவர்  திருமாளிகை” என்ற வாசகத்தை உற்று கவனித்தால் இரு பொருள் தருவதாக அமைத்துள்ளது என்று கூறுகிறார் அவை,  ஒன்று மாமன்னன் ராஜ ராஜ சோழனின் திரு உருவச்சிலை நிறுவப் பெற்ற திருமாளிகை என்பது ஒரு பொருளாகும். இரண்டு, ராஜராஜ சோழன் தங்கி வாழ்ந்த திருமாளிகை என்பது மற்றொரு பொருளாகும். எனவே எப்படி நோக்கினும் அங்கிருந்த திருமாளிகை ராஜராஜனின் நினைவு மாளிகை என்பது உறுதி என்றும், ஆகவே தான் அவர் மறைந்து  (கி பி 1014) 88 ஆண்டுகள் கழித்து அம்மாளிகையின் முன் மண்டப பகுதி சிதைந்தமையால் அதை குலோத்துங்க சோழன் காலத்தில் (கி பி 1112 இல்) கச்சிராஜன் என்பவருக்காக சிவபாத சேகர மங்கலத்தை (உடையாளூர் ) நிர்வகிக்கும் நடாறிபுகழன் என்பாரும் அவருடன் ஈசான சிவர், அறங்காட்டி பிச்சர் ஆகியோரும் விரதம் மேற்கொண்டு திருப்பணி செய்தனர் என்பதை அறிய முடிகிறது என்று பாலசுப்ரமணியன் ஐயா கூறுகிறார். மேலும் அவர் கூறுகையில், விரதம் மேற்கொண்டு திருப்பணி நிகழ்ந்தது அக்கட்டிடம் (ராஜராஜ தேவர் திருமாளிகை) ஒரு புனித இடமாகவும், வழிபடக்கூடிய இடமாகவும் கருதப் பெற்றது என்பதை குறிப்பதாகும், என்று அவரின் குடவாயில் சிறப்பு கட்டுரைகள் புத்தகத்தில்  குறிப்பிட்டு உள்ளார்.

தற்பொழுது உடையாளூரில் உள்ள சிவாலயத்தில் காணப்பெறும் கல்வெட்டுகளில், அவ்வூராகிய சிவபாத சேகர மங்கலத்தை ஸ்ரீமாகேஸ்வரதானம் என்றும் மாகேஸ்வர பெரும் தரிசனத்தாரால் நிறுவிக்க பெற்ற ஊர் என்பதும் கூறப்பெற்று உள்ளது. மேலும் அவ்வூரில் அபிமுக்தம் என்ற கோவிலும் இருந்ததாகக் குறிப்பும் காணப் பெறுகின்றது. மாகேஸ்வர பெருந்தரிசனத்தார் என்பவர் பாசுபத சைவ மார்க்கத்தை சார்ந்த  மாவிரதிகளாவர். இவர்கள் சமாதி கோவில்களான  பள்ளிப்படைகளையும், பிறவற்றையும் நிருவகிப்பவர்கள் ஆவர்.அபிமுக்தம் என்பதும் மோட்சம் தரக்கூடிய கோவிலாகும். இது காசி சேத்திரத்தின் பெயரால் எடுக்க பெற்றதாகும். அங்கு வித்யாசிவபண்டிதர் என்ற சிவபாத சேகர மங்கலத்துப் பண்டிதர் ஒருவர்  இருந்தார் எனவும் அறிய முடிகிறது. எனவே உடையாளூர் சோழர் காலத்தில் முக்தி அடைய விரும்புவோர் தவ வாழ்க்கை வாழ்ந்த ஊர் என்பது உறுதியாகிறது.

மாமன்னன் ராஜ ராஜ சோழன் கி பி 1012 இல் ராஜேந்திர சோழனுக்கு இளவரசு பட்டம் கட்டி தன் பொறுப்புகளை குறைத்துகொண்டு, கிபி 1014 இல் கும்பகோணத்திற்கு அருகே உள்ள திருவியலூரில் (திருவிசலூர்) தன் இறுதிகாலத்தில் சிவப்பேறு அடைய விரும்பிச் செய்யக் கூடிய துலாபாரதானம், ஹேமகர்ப்பதானம் போன்ற சடங்குகளை செய்துவிட்டு, பின்பு திருவலஞ்சுழியில் உள்ள சேத்ரபால தேவரை இருவரும் தங்கத் தாமரை மலர் கொண்டு வழிபட்டதாக கல்வெட்டுகள் கூறுகின்றன.

அந்திம காலத்தில் செய்ய வேண்டிய சடங்குகளை நிறைவேற்றிய மாமன்னன் ராஜராஜ தேவர், தங்கள் ஆதி பூமியாகிய பழையாறையில் ஒரு பகுதியாக விளங்கும் சிவபாத சேகர மங்கலத்தில் (உடையாளூர்) இருந்த ஒரு மாளிகையில் தங்கி இருந்து வானபிஸ்தம்  எனக் கூறப்பெறும் அந்திமகால ஆன்மிக வாழ்கையை மேற்கொண்டு அம்மாளிகையிலே அவர் உயிர் துறந்திருக்கலாம் என நம்பப்படுகிறது. அதனால் தான் அங்கு உள்ள கல்வெட்டு, சிவபாத சேகர மங்கலத்து எழுந்தருளி நின்ற ஸ்ரீ ராஜராஜ தேவரான ஸ்ரீ சிவபாத சேகர தேவர் திருமாளிகை என்று குறிப்பிடுகின்றது. அம்மாளிகையிலே அவருக்கு பள்ளிப்படை எடுத்திருக்ககூடிய சாத்திய கூறுகளும் உள்ளன. அந்த இடமே ராஜராஜ சோழனின் பள்ளிப்படை என்று குடந்தை என்.சேதுராமன் போன்ற ஆய்வு வல்லுனர்களும் கருதினார்கள் என்று குடவாயில் பாலசுப்பிரமணியன் அவர்கள் தன்னுடைய குடவாயில் சிறப்பு கட்டுரைகள் நூலில் குறுப்பிடுகிறார்.  

நமது மாமன்னனின் சமாதி

இத்தனை ஆதாரங்கள் இருந்தும் இன்னமும் இந்த இடம் ராஜ ராஜ சோழனின் சமாதியாக இருக்கக்கூடும் என்று தான் நம்பபடுகிறதே தவிர முறையான அகழ்வாராய்ச்சி இது வரை நடைபெறவில்லை. முறையாக அகழ்வாராய்ச்சி நடைபெற்றால்  இன்னும் கூடுதல் வரலாற்று உண்மைகள் வெளியே வரலாம்.ஆனால் அகழ்வாராட்சி செய்து உண்மை நிலையை கண்டறியாமல் ஒரு சில ஆய்வாளர்களும், யாரென்றே முகவரி இல்லாதவர்களும், சமூக வலைதளங்களில் போடும் செய்திகள் இருக்கின்றதே .. அப்பப்பா !!! கண்கொடுத்து பார்க்க முடியவில்லை.

ராஜராஜ சோழனின் சமாதி அங்கு இருகின்றதோ இல்லையோ, ஆனால் அங்கு எதோ ஒரு வரலாற்று உண்மை புதைந்து கிடக்கிறது என்பதை யாரும் மறுக்க முடியாது. அங்கு ஒரு மண்டபம் இருந்தது  என்பது நிரூபிக்கப்பட்டு உள்ளது. அங்கு ஒரு கல்வெட்டு கண்டெடுக்கப்பட்டு  உள்ளது. அங்கு எதோ ஒரு புரதான நினைவு சின்னம் உள்ளது என்று தெரிந்தும் அரசு ஏன் அந்த இடத்தை அரசுடைமை ஆக்காமல், அதை ஒரு பாதுகாப்பட்ட நினைவு சின்னமாக அறிவிக்காமல் இருக்கிறது என்பதே மிகப் பெரிய கேள்வி. அரசின் கவனத்திற்கு கொண்டு செல்ல வேண்டிய ஆய்வறிஞர்களோ அதற்கான எந்த முயற்சியும் செய்யாமல், முயற்சி எடுக்கும் சிலரையும் இது ராஜ ராஜன் சமாதி அல்ல என்று சண்டையிடுகிறார்கள். ராஜ ராஜா ! உன்னை பார்த்தால் படை நடுங்கியது அன்று மட்டும் தானா ??? இன்றும் நீ பலருக்கு சிம்ம சொப்பனம் தான். ராஜராஜ! எங்கே உன் சமாதியை ஆராய்ந்தால் தங்கள் பதவி போய்விடுமோ ? உயிர் போய்விடுமோ ? என்ற பயம்.

தமிழா !!! அங்கே புதைந்து கிடப்பது நம் பெருமை, நம்முடைய வரலாறு. நம் பழம்பெரும் நாகரிகத்தையும்,  உயரிய காலச்சரதையும்,  நாமே இந்த உலகிற்கு  முன்னெடுத்து செல்லமால்,  இப்படி சண்டையிட்டால் வேறு யார் செய்வார் கள் ?? முறையாக ஆராயாமல் இப்படி சண்டையிட்டும் பயந்து ஒதுங்கியும் இருப்பதால் யாருக்கு லாபம் ???  இந்த உலகிற்கு நம் பெருமைகளை எப்படி சொல்ல முடியும் ? யார் சொல்ல முடியும் ? ஒன்று படு தமிழா, உன் இனம் காக்க !!! உன் பழம்பெருமைகளையும்  புரதானங்களையும் மீட்டுக்க !!!!

இறுதியாக, இந்த இடத்தை ராஜ ராஜன் சமாதி என்று கூறிவரும் என் போன்றவர்களை எள்ளி நகையாடும் கூட்டத்தை பார்த்து ஒன்றே ஒன்று மட்டும் கூறி இந்த கட்டுரையை முடிக்கிறேன், நான் அங்கு செல்லும் பொழுது எனக்குள் அளவில்லாத  இன்பமும் சொல்ல முடியாத துன்பமும் என்னை ஆட்கொண்டதை உணர்ந்தேன். எனக்கு அகழ்வாராய்ச்சியை விட அங்கு செல்லும் பொழுது என் மனசாட்சி என்ன சொல்லியதோ அதையே நம்புகிறேன். அங்கே சென்றதும் என்னையறியாமல் நான் வணக்கம் செய்தேன். காலில் விழுந்தேன். தொட்டு வருடினேன். கட்டி அணைத்தேன். இது ஏன் ??? என்று எனக்கே புரியவில்லை. அங்கே எதோ ஒரு சக்தி  என்னை ஆட்கொண்டு அவ்வாறு என்னை செய்ய வைத்திருகின்றது என்று நான் நம்புகிறேன். இந்த இடம் முறையாக அகழ்வாராய்ச்சி செய்து ராஜராஜ சோழன் சமாதி இல்லை என்று நிருபிக்கட்டும் , அப்பொழுது உங்கள் காலில் விழுந்து மன்னிப்பு கேட்பதற்கும் நாங்கள் தாயார்.இந்த இடம் ராஜராஜ சோழன் சமாதி இல்லை என்று அகழ்வாராட்சியில் நிருபிக்கபடாதவரை உலகமே அதிர உரக்க சொல்வோம் இது எங்கள் மாமன்னன் ராஜ ராஜ சோழன் சமாதி என்று !!

                                                       சோழம் !!!! சோழம் !!!! சோழம் !!!!

கல்வெட்டு மற்ற ஆதாரங்களும்  குடவாயில் பாலசுப்ரமணியம் அவர்களின் குடவாயில் சிறப்பு கட்டுரைகள் புத்தகத்தில் இருந்து எடுக்கப்பட்டது. பாலசுப்ரமணியம் ஐயாவிற்கு எனது நன்றிகள்

எனக்காக ஆதாரங்களை திரட்டி தந்து பல வரலாற்று உண்மைகளை என்னுடன் பகிர்ந்துகொண்ட சசிதரன் அவர்களுக்கும், எனக்கு பல செய்திகள் சேகரித்து தந்த கோவிந்தராஜன் ஐயாவிற்கும், என்னை அழைத்து சென்ற வடிவேல் பழனியப்பன் ஐயாவிற்கும், என்னோடு பயணித்த விஜயகரன் , லோகேஷ், அன்பரசு மற்ற அனைவருக்கும், பிரதி பார்த்து திருத்தி கொடுத்த அஷ்வினி மற்றும் செந்திலுக்கும், என்னுடைய அனைத்து பதிவிற்கும் ஊக்கம் தரும் வார்த்தைகளை சொல்லி என்னை உற்சாகப்படுத்தும் சுரேஷ் குமார் ,ஜெயலக்ஷ்மி உள்ளிட்ட அனைவர்க்கும் என்னுடைய  பணிவான நன்றிகளை தெரிவித்து கொள்கிறேன்

சோழம் !! சோழம் !!! சோழம் !!!

நன்றி

கணேஷ் அன்பு